O dianteiro monfortino Diego Arias regresa ao Lemos tras deixar a SD Chantada, club no que militaba. O veterano xogador volve ao equipo que considera a súa casa e cuxa camiseta vestiu máis veces ao longo da súa carreira.
Diego Arias aceptara a proposta de renovación da SD Chantada e a súa continuidade no Sangoñedo incluso se fixo oficial o pasado venres. Con todo, o recente interese do Lemos e a presenza no banco de Alberto López, adestrador ao que coñece doutras etapas, fixéronlle decantarse polo proxecto do histórico cadro monfortino.
Diego Arias despediuse da SD Chantada agradecendo o trato "exquisito" de compañeiros, directiva e afección. Indicou que desprazarse catro veces por semana desde Monforte a Chantada supuña "un gran esforzo" e mostrouse moi ilusionado coa súa volta ao Lemos, equipo que está unha categoría por encima, Autonómica Preferente.