miércoles. 21.08.2019 |
El tiempo
miércoles. 21.08.2019
El tiempo

Detido un monfortino por agresión sexual co agravante de secuestro

A Policía Nacional rescatou a unha muller de orixe dominicano nunha ferraxería situada na Rúa Doutor Casares

Un monfortino duns 30 anos de idade foi detido na mañá do martes pola Policía Nacional acusado de dous delitos, uns de secuestro, en concreto detención ilegal; e outro de agresión sexual. Os feitos, segundo as fontes consultadas, ocorreron na ferraxería na que traballa e na que exerce como un dos seus responsables de xerencia, a situada ao principio da Rúa Doutor Casares (A Pena) e cuxa parte traseira dá ao Paseo do Malecón.

Segundo testemuñas presenciais, varias dotacións de policía acudiron de madrugada ata este céntrico establecemento da cidade alertados pola vítima, unha muller maior de idade de orixe dominicano, que quedou encerrada no establecemento logo de, supostamente, sufrir diferentes vexacións polo acusado.

Este foi detido á primeira hora da mañá do martes e trasladado á comisaría da Policía Nacional, onde foi levado a un dos seus calabozos.

Espérase que entre este mércores e o xoves pase a disposición xudicial para dar conta dos feitos sucedidos, á vez que se lle procurará un avogado de oficio para que o acompañe na súa declaración ante o xuíz.

O acusado enfróntase a importantes penas de cárcere pola súa acción, xa que o Código Penal establece que todo aquel que encerrase ou detivese a outro, privándolle da súa liberdade, será castigado coa pena de prisión de catro a seis anos.

En canto ao delito de agresión sexual, dise que atentar contra outra persoa utilizando violencia ou intimidación, sen chegar a haber penetración, supón unha pena de prisión que ten un custo desde un ano a cinco de prisión.

Detido un monfortino por agresión sexual co agravante de secuestro