A Policía Nacional detivo a un home en Monforte por ameazar cunha machada a un veciño con quen mantén unha serie de desavinzas. O presunto autor dos feitos, a quen se lle imputa un delito de ameazas graves, admitiu a súa participación nos mesmos e entregou voluntariamente a arma, de 15 centímetros de folla.
Todo ocorreu unha tarde, cando a vítima regresaba a casa tras finalizar a súa xornada laboral. Ao chegar á zona na que habita atopouse co seu veciño falando con outra residente na zona. Segundo transmitiu a Policía, o presunto agresor empezou a recriminar ao outro home, que lle reprochou a súa actitude. Foi entón cando o primeiro entrou en cólera, dirixiuse ao seu domicilio, colleu a machada e comezou a perseguir á vítima.
De forma repentina, o detido cesou o ataque e regresou á súa vivenda. Inmediatamente, o ameazado chamou ao 091. Pouco despois chegaron os axentes, que procederon á detención do outro home, que foi posto a disposición xudicial.
