Axentes da Policía Nacional detiveron este mércores e xoves oito persoas, catro homes e catro mulleres, pola súa suposta participación na liorta na que resultaron lesionados cinco mozos a pasada fin de semana en Monforte. Un dos arrestados é menor de idade, segundo informa o corpo nun comunicado.
Os feitos ocorreron na madrugada do pasado sábado, nunha coñecida rúa de lecer nocturno da cidade do Cabe. Os feridos tiveron que recibir asistencia médica no Hospital de Monforte e unha delas foi derivada de urxencia ao Hospital Teresa Herrera, da Coruña, con lesións graves.
Un dos feridos foi trasladado á Coruña con lesións graves
"A investigación realizouse no menor tempo posible, ao ter coñecemento os axentes de que entre mozos da cidade circulaba o rumor dunha posible resposta violenta por parte das vítimas", precisa a Policía Nacional, circunstancia que "foi descartada polos investigadores". En todo caso, "procurouse a rápida identificación de todos os implicados para evitar calquera tipo de consecuencia que puidese xerar novos incidentes violentos".
A Policía Nacional xa advertira en outubro de que se detectara un importante aumento de pelexas de madrugada en Monforte.
