A Garda Civil identificou e denunciou a un veciño de Chantada por cometer actos vandálicos en pleno centro, na Rúa Leonardo Rodríguez. O home esnaquizou varias árbores e desde o Concello apuntaron que este luns se persoaron na causa contra el.
Segundo relataron varias testemuñas a este xornal, o implicado atopábase baixo os efectos do alcol cando se produciron os feitos. Antes de romper as árbores estivo en dous coñecidos bares desta rúa, que é peonil. Foi ao saír do segundo cando agarrou os exemplares afectados e partiunos pola metade.
A Garda Civil persoouse no lugar alertada polos veciños e procedeu á identificación do autor destes estropicios. Este luns pola mañá, o equipo encargado do mantemento de parques e xardíns do Concello retirou as árbores esnaquizadas.
O concelleiro de medio ambiente, o independente José Castor Novoa, sinalou que se trata de exemplares de Prunos Serrulata Kanzan, moi habituais na decoración urbana dos municipios. O Concello xa solicitou novos exemplares para substituílos polos destruídos e devolver á Rúa Leonardo Rodríguez a súa habitual decoración.
Non é a primeira vez que o centro urbano de Chantada se ve afectado por actos deste tipo. O máis recente ocorreu hai uns meses na Rúa Profesor Luis García Arias, no barrio de Lama das Quendas. Dous mozos baixaban dos pubs situados nesta zona e esnaquizaron algunhas das árbores plantadas na beirarrúa.
