A colleita na denominación de orixe Ribeira Sacra volveu a alcanzar, por segundo ano consecutivo, a cualificación de "excelente", segundo informou o consello regulador logo da cata anual para establecer unha valoración media dos viños elaborados coa uva recollida en 2018.
A cata de cualificación celebrouse este venres no Centro Sociocultural de Paradela e os encargados de puntuar os viños valoraron 10 referencias, representativas das cinco subzonas da denominación de orixe: Amandi, Chantada, Quiroga-Bibei, Ribeiras do Miño e Ribeiras do Sil.
Para alcanzar esa valoración media, os catadores e catadores profesionais probaron mostras de pequenas e de grandes adegas, tamén probas de depósito e de viños xa embotellados. O resultado foi unha puntuación de 8.1, coa catalogación de "excelente".
Antonio Raluy, da Asociación Galega de Catadores, destacaba que "son viños sorprendentes, no sentido de que notas unha estrutura e un frescor moi interesantes a estas alturas do ano", polo que "dá a impresión" de que será "unha anada para gozar", porque "esa frescura adiántanos un ano esperanzador".
