lunes. 25.05.2020 |
El tiempo
lunes. 25.05.2020
El tiempo

O Consello da Xunta declara O Courel municipio de interese turístico

O Courel. ARQUIVO
O Courel. ARQUIVO
A candidatura cumpre cos requisitos esixidos, entre eles o de que a media ponderada anual de poboación turística sexa superior ao 25% dos veciños

O Consello da Xunta aproba este xoves a declaración do Courel como municipio de interese turístico. A solicitude foi presentada en 2018 polo Concello e exposta hai dous meses ao Consello Galego de Turismo, ao que se lle presentou unha serie de informes como aval para recibir a distinción.

Neles reflectiuse o traballo desenvolvido para comprobar que O Courel cumpría cos requisitos establecidos para facerse con esta declaración. Un deles é que a media ponderada anual de poboación turística supere nun 25% o número de veciños.

Ademais, no Courel a cantidade de prazas de aloxamento para visitantes e de segundas residencias está por enriba do 50% dos habitantes, outro dos requirimentos que debe cumprir un municipio de interese turístico.

A declaración leva igualmente contar dentro do territorio con algún recurso ou servizo susceptible de producir unha atracción que xere unha cantidade de turistas cinco veces superior á poboación. Debe computarse ao longo dun ano e repartirse, polo menos, en máis de 30 días.

Tivéronse en conta elementos como a casa de Uxío Novoneyra, varias aldeas ou a Festa da Castaña

OUTRAS ESIXENCIAS. A distinción valora os servizos prestados, a promoción e protección dos recursos ou a sinalización, información, atención e orientación cara aos elementos máis importantes. No caso do Courel cítanse, por exemplo, a casa natal de Uxío Novoneyra, as aldeas de Seceda e Froxán ou a Festa da Castaña

Tamén se tivo en conta o recoñecemento como Xeoparque Mundial parte da Unesco. Quiroga e Ribas de Sil comparten esta declaración. Os tres concellos conforman o territorio denominado Montañas do Courel.

A Xunta recordou a posta en marcha dun plan de dinamización turística que engloba os tres municipios do xeoparque. O Goberno galego precisou que o proxecto se fixo a partir dun convenio de colaboración entre as consellerías de Medio Rural e Cultura e Turismo que foi dotado cun orzamento de 30.000 euros.

A distinción do Courel como municipio de interese turístico será efectiva a partir deste xoves. O Consello da Xunta aborda a cuestión para dar luz verde a outro nivel de protección do territorio.

O Consello da Xunta declara O Courel municipio de interese turístico
comentarios