"Os monfortinos pagarán menos impostos non 2020", espetou o alcalde, José Tomé, nada máis empezar a súa intervención para anunciar os cambios nas ordenanzas fiscais aprobadas este luns polo pleno da corporación. Entre esas modificacións atópase a redución á metade das taxas do cemiterio municipal.
O rexedor socialista de Monforte sinalou que as baixadas se producirán tanto á hora de levar a cabo sepulturas como transicións. É a rebaixa máis importante, pero non a única. A outra ten que ver co servizo de recollida de lixos e afectará as vivendas que funcionen como oficinas —caso de avogados, arquitectos ou asesores—, que tributarán só pola actividade profesional e seralles suprimida a doméstica. Tomé indicou que estas medidas están incluídas nos orzamentos municipais que propuxo o pasado xaneiro e que non saíron adiante, pois entón gobernaba en minoría. As eleccións de maio outorgáronlle maioría absoluta. Con todo, e segundo explicou o propio alcalde, non puido aplicar os cambios ao non estar permitido facelos en metade do ano.
Respecto ao uso do cemiterio, Tomé precisou que por cada sepultura, cabida, oco ou altura pagaranse cinco euros anuais. Ata agora, dixo o rexedor, este servizo supuña dez euros para os veciños. No caso dos nichos de tres alturas, o imposto descenderá de 30 euros ao ano a 15.
TRANSMISIÓNS. No caso do parentesco de primeiro grao, os veciños pasarán de pagar 59,156 euros a 29,58. Para os de segundo, baixarase dos 177,46 aos 88,73; para os de terceiro grao, de 177,46 a 354,93 e para os de cuarto; de 532,40 a 266,20 euros.
Tomé engadiu que o resto de ordenanzas municipais quedarán conxeladas. Só actualizaranse os índices de prezos de consumo (IPC) que o teñan establecido por contrato. Nesta situación atópanse as piscinas municipais, o abastecemento de auga e a rede de saneamento, que sufrirán unha subida do 0,3% de setembro de 2018 a agosto deste ano. Tamén é obrigado cambiar o IPC da recollida de lixo, aínda que será menor, o 85% do 0,3%.
O alcalde de Monforte concluíu sinalando que se manterán as bonificacións no Icio, o IAE e o Ibi. O obxectivo destas medidas, subliñou, é favorecer a implantación de empresas na cidade do Cabe e a creación de novos postos de traballo. As oficinas en vivendas só pagarán os impostos da recollida de lixo pola súa actividade profesional e non pola doméstica
