Un dispositivo máis amplo, co dobre de axentes e varios reforzos chegados doutras poboacións de Galicia velará pola seguridade dos veciños durante a celebración das festas patronais de Monforte. Así se acordou o mércores nunha xunta na que participaron a subdelegada do Goberno en Lugo, Isabel Rodríguez; o alcalde, José Tomé; a tenente de alcalde, Gloria Prada; e representantes dos distintos corpos, entre outras autoridades.
Un dos grosos será o da Policía Nacional. Nas patronais, que arrincan este domingo, non só haberá medios propios da comisaría de Monforte, senón tamén doutras cidades de Galicia como Ourense ou Vigo. En total, serán entre seis e dez axentes os que completen a unidade.
A Policía Local tamén se reforzará con motivo das festas. Haberá dúas patrullas tanto nas quendas de mañá como nos de tarde e os de noite. Estas prestacións veranse incrementadas na última xornada de festexos, o venres 16, con motivo dos fogos artificiais do río Cabe.
Entre seis e dez axentes da Nacional completarán unha unidade coa que colaborarán a Garda Civil e a Policía Autonómica
Os seis días de celebración contarán ademais coa presenza da Garda Civil, que actuarán principalmente nos arredores da cidade. A súa presenza será abundante nas proximidades do aparcadoiro provisional que o Concello habilitará entre a vía do ferrocarril e o paso da estrada N-120.
A Policía Autonómica completará o dispositivo. A súa función centrarase na prevención do consumo excesivo de alcol nas zonas con maior presenza de público.
HOSTELERÍA. Un dos sectores máis beneficiados polas patronais de Monforte é sempre o dos bares, cafeterías e restaurantes, así como o hostaleiro. Desde a Asociación Provincial de Empresarios de Hostalería e Turismo de Lugo (Apehl) informaron o mércores que autorizarán aos seus negocios asociados en Monforte a ampliación dos seus horarios mentres duren as festas. Os establecementos poderán abrir ata unha hora máis tarde do habitual.
As previsións son moi optimistas e apuntan a unha gran afluencia de público a Monforte entre este domingo e o venres 16. Os bos vaticinios non só afectan á cidade do Cabe. O consorcio de turismo espera que a Ribeira Sacra bata en agosto outra marca de ocupación.
