O reforzo do servizo de expedición do documento nacional de identidade (DNI), pasaportes e carnés de residentes para estranxeiros posto en marcha entre os meses de xullo e setembro na comisaría de Monforte saldouse coa renovación de 4.200 documentos, segundo destacou este martes a responsable da Policía Nacional na cidade do Cabe, Mónica Gutiérrez, a primeira muller que ocupa o cargo de inspectora xefe na comisaría monfortina.
Desde o gabinete de prensa da Policía Nacional de Lugo destacaron que algunhas actividades se viron favorecidas pola rápida realización de trámites para pór ao día os documentos de identidade, sobre todo nos casos de necesitar un DNI electrónico para a solicitude de expedientes de regulación temporal de emprego (Ertes), actualizar os datos de monfortinos desprazados ás súas segundas vivendas ou ben para poder solicitar as axudas municipais de apoio ás familias promovidas polo Concello, proceso que está en marcha e que aínda non concluíu, pois falta a concesión dunha cuarta fase de axudas.
Desde a comisaría monfortina destacaron que ese labor de axilización de documentos de identidade valeu para que as actividades dos vendimiadores na Ribeira Sacra, "todas elas con enorme impacto para o desenvolvemento económico da comarca nestes tempos de pandemia", non se visen afectadas o feito de que os temporeros non dispuxesen de documentación.
ESFORZO. E é que desde a Dirección Xeral de Policía subliñaron que fixeron un importante esforzo nos meses de xuño, xullo e setembro para que a oficina de expedición de documentos de strong<> identidade de Monforte traballase ao maior ritmo posible.
Así, ampliouse o horario de atención ao público en xornada de tarde, entre as catro e as sete, algo que permitiu durante os meses de verán expedir 559 documentos máis.
