Os comerciantes de Monforte empezan a ver a luz ao final do túnel, logo dun inicio de tempada complicado polo mal tempo, o mes de agosto e as iniciativas para animar as compras como a Noite Branca, organizada polo Centro Comercial Urbano, están a resultar un éxito e logran sacar o produto que se estaba amontoando nas tendas.
A noite do sábado ao domingo os establecementos abriron as súas portas ata a madrugada, ademais organizáronse varias actividades na rúa e no interior dos comercios ofrecéronse importantes descontos. A iniciativa coincidiu coa primeira noite de festas e coa chegada de turistas máis importante do ano. Entre unhas cousas e outras, a xente animouse a entrar e comprar e mellorar o balance da tempada.
"Desde hai uns anos a xente pénsallo máis á hora de comprar, pero este inicio de tempada estaba a ser especialmente complicado porque o tempo foi moi cambiante. Fixo frío, logo veu o sol pero volveu o frío, así que chegamos ás rebaixas con bastantes artigos. Iniciativas como esta axudan sempre e danlle un bo empuxón ás contas", explicaban nun dos establecementos da Rúa Comercio, unha das que máis tendas aloxa da cidade do Cabe.
"O tempo xogounos unha mala pasada en meses fortes de vendas como maio e xuño. Aos poucos foron saíndo os artigos e coa Noite Branca sácase moito produto. Tamén hai xente que pica xa na nova tempada", engadían noutro comercio da Rúa Cardenal.
A iniciativa é tamén unha boa oportunidade para que os visitantes coñezan a oferta local e se animen coas compras. "Hai que ser conscientes de que non podemos vivir só dos veciños, que xa nos compran todo o ano. Hai que buscar novos clientes e aí entra todo o que podamos vender por internet e as ideas que nos axuden a chegar aos turistas", afirmaba un directivo do CCU.
