A quiroguesa Maribel Raposo Rodríguez foi recoñecida como Gran Mestra da Cociña Tradicional polo seu traballo na cantina O Foguete, en Pacios da Serra. Trátase dun distintivo que outorgan a Federación de Academias da Gastronomía dos Camiños a Santiago e a Academia Galega de Gastronomía.
"Estou moi sorprendida e emocionada", declarou Maribel, cociñeira no Foguete desde 2004. Ese ano volveu a Quiroga desde Venezuela, país ao que emigrara e onde xa traballaba entre fogóns. Servir e cociñar para o público foi o seu oficio a ambos os dous lados do Atlántico.
"Daquela convencéronme para vir aquí preparar a comida e ao final acabei mercando a cantina", comenta a hostaleira, que nun principio facía a comida principalmente para os traballadores do sector da lousa, de enorme relevancia na comarca quiroguesa e que paraban no seu negocio.
Logo empezaron a chegar máis clientes. Os primeiros, como recorda, foron os membros da asociación de ciclistas de Ourense. "Eles chegaban todos mollados e eu ofrecíalles café, salchichón ou queixo. Todo ou que tivera pola casa", relata a cociñeira.
No interior do establecemento, Maribel prepara comida puramente caseira. Cocido, pan feito por ela mesma, empanadas, chourizos e todo tipo de produtos derivados do porco e típicos en tempos de matanzas viaxan desde as cociñas ao padal dos clientes desde hai xa 17 anos.
"Cheguei a ter reservas a tres meses vista nas fins de semana", comenta a cociñeira ao recordar os tempos previos á actual pandemia, que limita a súa actividade a dar para comer só aos mineiros da lousa, que acoden cada día fieis á súa cita no Foguete.
O PREMIO. Un bo día, os pratos de Maribel saciaron aos membros da Federación de Academias da Gastronomía dos Camiños a Santiago e a Academia Galega de Gastronomía, que na súa ruta pola zona do Courel detivéronse no Foguete a comer.
"Dixeron que nunca comeran tan ben e que os meus pratos eran merecedores dun premio. Para unha cociñeira, ese é a mellor gabanza posible", sinala. Incluso unha das comensais aquel día pediulle a Maribel que lle gardase un pouco de carne de xabaril nun táper para "levarlla ao seu home".
Maribel Raposo recibiu o seu diploma de mans do vicepresidente da Academia Galega de Gastronomía, Francisco García Bobadilla, e o alcalde de Quiroga, Xulio Álvarez, en recoñecemento "ao seu coidado e custodia de receitas tradicionais e por manter viva unha forma de cociñar típica".
