Malabaristas, pallasos, trapecistas ou cómicos farán gozar a Monforte dentro duns días. Os responsables do circo Nevada preparan a súa función máis especial, destinada a agradecer a solidariedade dos veciños. Esta familia estremeña quedou atrapada na cidade do Cabe ao comezo do estado de alarma.
Desde o 10 de marzo levan ancorados na gran chaira da Rúa Sarria, onde se celebran habitualmente este tipo de espectáculos en Monforte. Ían actuar os días 13, 14 e 15. A macabra viaxe do Covid-19 interrompeu todo e deixou 14 persoas, entre elas tres nenos e unha muller de 93 anos, sen poder desenvolver o seu modo de vida nin regresar a casa.
As dificultades foron tantas que Monforte se implicou ao máximo. "Portáronse de mil, non de dez. Grazas a eles sobrevivimos", asevera Javier Segura, responsable do circo. O Concello, Cáritas, Cruz Vermella e unha infinidade de negocios como restaurantes, panaderías e o supermercado Familia colaboraron para facer que o confinamento do circo Nevada fose algo máis levadío.
Atendendo ás recomendacións sanitarias, o aforamento pasará de 300 persoas a entre 80 e 90
Tamén xogaron ao seu favor as grandes dimensións da parcela que foi o seu fogar os últimos case tres meses. Acubillados nunha caravana e acompañados por varios cans, podían investir as horas en ensaiar os seus espectáculos. "Se non puidésemos practicar non sei que nos pasaría, pero desde logo nada bo", comenta Javier Segura.
A situación dista moito de ser o ideal. Aínda así, os membros do circo Nevada están ilusionados ante o seu regreso ás actuacións, que levarán a cabo os días 4, 5, 6, 7, 11, 12 ,13 e 14 de xuño. "Nacín debaixo dunha bancada, a miña vida é o circo. Por iso cando vexamos a xente sentada será unha inxección de moral", afirma Segura.
Por suposto, a actuación máis especial do circo Nevada farase seguindo as recomendacións sanitarias. Haberá distancia física na bancada e o aforamento pasará das 300 ás 80 ou 90 persoas, por iso recoméndase reservar entrada no número de teléfono 633.52.00.13. Quen o desexe poderá achegar un donativo económico para axudar a familia.
