Os tres institutos de Monforte -Daviña Rei, A Pinguela e Río Cabe- organizaron este martes a denominada Mostra FP Lemos, unha pequena feira na que intentaron informar os estudantes das alternativas que ofrece cada un dos centros no ámbito da Formación Profesional, así como as saídas profesionais dos distintos ciclos.
A xornada desenvolveuse na casa da cultura e na Praza de España. No salón de actos os alumnos puideron escoitar e participar en charlas e mesas redondas. Na praza, colocáronse distintas casetas informativos e desenvolvéronse talleres orientados aos mozos e as súas familias.
Dentro da parte máis teórica da iniciativa, José Antonio Jardón, responsable do servizo de xestión de FP, deu unha conferencia sobre as alternativas de futuro da Formación Profesional.
Tampouco faltou á cita o conselleiro de Economia, Emprego e Industria, Francisco Conde, quen resaltou que a formación é "a mellor garantía para responder aos novos perfís profesionais derivados da transformación dixital". O monfortino insistiu en que "a transformación tecnolóxica xa se está a notar nos principais sectores estratéxicos da economía galega que precisan profesionais cualificados para cubrir as especialidades que máis demanda o mercado laboral neste momento".
Pola tarde, desenvolveuse unha mesa redonda na que distintos empresarios deron a coñecer as súas experiencias coa FP.
A xornada teórica pechouse cun relatorio da escritora e xornalista Eva Millet Malagarriga titulada 'Hiperprotección, fillos felices ou fillos sans'.
A parte práctica da mostra incluíu demostracións sobre as aprendizaxes e as saídas profesionais das ramas formativas de Sanidade, Electricidade e Electrónica, Transporte e Mantemento de Vehículos, Servizos Socioculturais á Comunidade, Hostalería e Turismo, Actividades Físicas e Deportivas, Informática e Comunicacións e Imaxe Persoal.
Ademais, desenvolveuse unha visita ao centro histórico de Monforte guiada polos alumnos do ciclo superior de Turismo e houbo varias actividades de 'parkour' que correron a cargo do colectivo Vella Escola.