O Centro do Viño de Monforte, onde se atopa a oficina municipal de información turística, o museo centrado na viticultura heroica e unha vinoteca coa práctica totalidade das referencias de viño que elaboran o centenar de adegas da denominación de orixe, recibiu a un total de 7.090 persoas entre os meses de xaneiro e xuño deste ano.
Destaca o número de visitantes que se achegaron para coñecer os recursos paisaxísticos e patrimoniais de Monforte e a súa contorna, así como as actividades que se poden realizar, Neste caso, contabilizáronse 4.694 consultas. Os meses de xaneiro, febreiro e marzo foron os máis frouxos, con 181, 208 e 511 entradas, respectivamente . Abril, mes no que tivo lugar a Semana Santa, os números disparáronse ata as 1.459. En maio houbo 1.049 e en xuño, 1.013.
Polo que respecta ao museo do viño, 2.396 coñecérono arroxando cifras medias de 400 persoas ao mes.
Os datos afirman que Monforte e a Ribeira Sacra acollen cada vez a máis visitantes
A procedencia dos viaxeiros é moi diversa. A nivel nacional destacan os chegados da Coruña, Madrid, Barcelona ou Asturias. En canto aos internacionais, estes proceden de América Latina, Reino Unido, Francia e Portugal.
Outro dato achegado desde o Centro do Viño é o crecente interese polo Camiño de Inverno. En xaneiro houbo sete recepcións; en febreiro, outras sete: en marzo, 17; en abril, 21; en maio, 70; e en xuño, 35.
Os datos consolidan a idea de que Monforte e a Ribeira Sacra recibe cada vez máis visitas.