A Consellería de Medio Rural investirá preto de 490.000 euros nunha iniciativa de mobilización de bosques para recuperar a produción da castaña no Courel. O conselleiro, José González, visitou este venres o municipio para supervisar unha medida que abarca a máis de cen propietarios e unha superficie de 80 hectáreas.
A actuación céntrase inicialmente nas parroquias de Moreda e Folgoso. Os traballos xa arrincaron coa identificación dos donos dos terreos. Agora trabállase nunha segunda fase centrada na limpeza de viarias e rozado dos terreos. O reto é que a produción dos máis de 9.500 castiñeiros que hai repartidos por esas 80 hectáreas de terreo das dúas parroquias sexa sostible.
O próximo ano, o proxecto entrará na súa última etapa con pódaa das árbores e as melloras sanitarias dos exemplares para que, a maioría abandonados, recuperen progresivamente a súa capacidade produtiva.
A iniciativa do Courel forma parte das políticas da Xunta de Galicia para mobilizar terras en desuso
Este venres acompañaron ao conselleiro no seu percorrido a propia alcaldesa do Courel, Dores Castro; o director da Axencia Galega de Desenvolvemento Rural (Agader), Miguel Pérez Dubois; a secretaria do Parlamento de Galicia, Raquel Arias, e o presidente do GDR Ribeira Sacra-Courel, José Manuel Arias.
O MARCO. A iniciativa do Courel forma parte das políticas da Xunta de Galicia para mobilizar terras en desuso, que suporán en conxunto un investimento total que supera os 2,7 millóns de euros.
Na actualidade está a traballarse en oito iniciativas -incluíndo esta de O Courel- en diferentes localizacións e sectores produtivos. Así, actúase na posta en valor de terras abandonadas para prados en Sober, na recuperación de pastos no Ancares, de zonas de reestruturación parcelaria afectadas por incendios en Cualedro e Oímbra, de áreas para produción de pemento e horta en Arnoia, prados en Val de Lemos e outras actuacións semellantes en Sarria e Ferrol.
O obxectivo é recuperar cultivos en áreas en desuso para polos en valor mediante o seu aluguer pactado a través de Agader e os bancos de terras.
