O castro de A Torre de Sobredo, no municipio do Courel, esperta cada vez maior interese por parte das persoas que se achegan a este municipio para coñecer os seus recursos patrimoniais e naturais. A alcaldesa, Lola Castro, sinalou que é dos máis visitados polo seu fácil acceso, pero tamén por estar limpo de maleza grazas aos sucesivos campos de traballo que actuaron nel.
Trátase dun poboado fortificado construído no século I logo de Cristo, tal e como se recolle nos paneis instalados xunto ao complexo.
Foi levantado co obxectivo de funcionar como punto de control de paso ás numerosas explotacións auríferas da súa contorna. Tras anos de abandono volveuse a ocupar no século IV da presente era.
O castro está situado sobre unha terraza de lousa a uns 300 metros do río Lor. Ten unha superficie de 6.000 metros cadrados (incluíndo varios fosos) e foi edificado maioritariamente con laxas de lousa, tanto nas construcións do interior do castro como nas dúas liñas de muralla que reforzaban as defensas naturais do castro.
O acceso a el é sinxelo. Na estrada entre Folgoso e Seoane do Courel hai que coller o desvío cara a Sobredo e máis adiante, de camiño a este lugar, un cartel indica a subida ao castro, que se debe facer a pé. Trátase dun carreiro con moita pendente que permite chegar aos paneis informativos e á construción.
Lola Castro indicou que desde o Concello traballan na posta en valor dos numerosos castros que hai no territorio. Referiuse a outros en bo estado de conservación e limpeza como os de strong<> Vilar, Vilamor e Seceda, Este último, destacou a rexedora local, será obxecto dunha nova limpeza de maleza esta primavera.
Así mesmo, espera que a Xunta continúe co seu apoio para a recuperación de O Castro de Cido, onde se fixo xa unha cata para coñecer o alcance do que pode atesourar.
A alcaldesa courelá dixo que hai unha gran cantidade de castros de gran interese histórico relacionados coa extracción de ouro que realizaron os romanos fai 2.000 anos, pero que teñen que ir, por orzamento, aos poucos na súa recuperación.
