"Tiña que haber varios Castañazos", contesta Elvira Brao, propietaria da pensión Yoel de Chantada, cando se lle pregunta polo festival. O seu local, como practicamente todos os da comarca, está cheo para esta fin de semana polo evento, que dará comezo o venres.
Algúns dos establecementos consultados afirman levar tempo sen unha soa praza dispoñible con motivo do Castañazo. é o caso do hotel Río Bubal, en Carballedo, que indica que comezou a recibir chamadas para reservar habitación hai dous meses. Case todas son de público novo e moitas, de persoas que repiten no festival respecto de anos anteriores.
Na mesma situación áchase o hotel Mogay, en pleno centro de Chantada. "Estamos ao cento por cento e o festival ten moito que ver. Case todos os que se hospedarán aquí son novos", confirman desde o establecemento.
Tamén o hotel Altamira de Chantada, situado moi preto do linde con Carballedo, está a rebordar. "Temos xente que queda a durmir aquí polo festival que é habitual por estas datas. Viñeron outros anos, gustoulles e repiten", subliñan os responsables deste negocio.
Elvira Brao vai máis aló e afirma que este tipo de actividades son necesarias para dinamizar municipios rurais como Chantada. "Se non hai xente nova, a vila morre. Encántame que haxa eventos coma este ,"comenta.
As valoracións son similares entre boa parte da hostalería, que ve no Castañazo unha oportunidade fantástica de recibir clientes durante unha tarde de novembro, co inverno chamando á porta e cada vez menos horas de sol. Desde a organización do festival prevén outra vez unha asistencia masiva que permitirá encher, ademais dos diferentes negocios do municipio, os pavillóns habilitados para acampar mentres dure o evento.
A apertura destes producirase o venres, ás 15.00 horas. Non se pasará a chave ata o domingo ás 14.00 horas. Os concertos albergaraos o mercado gandeiro, que abrirá ás 19.30 horas.
As actuacións das once bandas que forman parte este ano do cartel non son as únicas actividades do Castañazo. O sábado, ás 12.00 horas, o público infantil poderá gozar de Peter Punk Pallaso e Treboada Rock. Desde as 15.00 horas haberá cantos de taberna e ás 19.00 horas, uns pasarrúas de Mekanika Rolling Band.
