A directiva do Círculo Recreativo e Cultural de Chantada, máis coñecido como Casino, prevé ter listas as reformas das súas instalacións antes de que finalice este ano. O proxecto inclúe a instalación dun ascensor, unha pista de pádel ou un salón de minicine, entre outras actuacións.
O presidente da sociedade, Ángel Corredoira, 'Gelucho', destacou que as obras levan a cabo con financiamento propio e engadiu que a súa intención é pór as instalacións, xa renovadas, a disposición de todo o mundo, pero con preferencia para os socios, que actualmente son uns 160. Desde o Casino recoñeceron que a actual crise sanitaria afectou á marcha das obras, que sufrirán atrasos. Aínda así, esperan terminalas antes de fin de ano.
Entre as accións pendentes atópase o arranxo da cuberta da parte dianteira da fachada
Unha das novidades máis significativas será o minicine. O directivo encargado desta sección, Alfredo Pardo, di que o obxectivo da mesma é "recuperar a cultura cinematográfica da vila" e ofrecer un espazo onde desenvolver emisións, festivais, presentacións ou exposicións temáticas.
A pista de pádel situaríase na parte traseira das instalacións, onde están os xardíns. Estes serán tamén, segundo explicou Gelucho, reformados.
Entre as accións pendentes atópase, ademais, o arranxo da cuberta da parte dianteira da fachada. Xa se levou a cabo o arranxo da traseira e fixéronse labores de pintura.
O presidente do Casino concluíu que o custo por strong <>usar estas instalacións será menor para os socios, que pagan ao mes unha cota de dez euros.
