Case oitocentas persoas gozaron este verán dos paseos en barca polo río Cabe que puxo en marcha o Concello de Monforte de Lemos para ampliar a súa oferta turística e para atraer visitantes á cidade, que é a segunda poboación por número de habitantes da provincia de Lugo.
Segundo informou o propio goberno local, desde mediados de xuño e ata o 15 de setembro, o Club de Piragüismo Quixós, que se encarga da xestión desta actividade, contabilizou un total de 798 viaxes.
Agosto foi o que concentrou un maior número de paseos en barca polo río Cabe, dado que máis da metade das viaxes contabilizadas, un total de 411, foron rexistrados neste mes, que é cando se celebran as festas patronais da localidade.
En declaracións aos medios de comunicación, o alcalde da localidade e presidente da Deputación, José Tomé, dixo que a xente se animou durante todo o verán "a remar para poder" gozar dunhas "vistas privilexiadas do tramo fluvial no seu percorrido urbano".
Ademais, destacou que "unha porcentaxe importante das persoas que realizaron esas viaxes eran doutras comunidades españolas" ou cidadáns "estranxeiros".
O punto de inicio deste percorrido fluvial é o embarcadoiro do Parque dos Condes e cada paseo ten un custo de 3,25 euros por persoa.
