A empresa láctea de Taboada Casa Macán reclama a Central Lechera Asturiana sete millóns de euros. É a suma do investimento que realizou nas súas instalacións para cumprir cun acordo empresarial que non chegou a materializarse e a estimación das ganancias que deixou de ingresar durante os dez anos, máis tres prorrogables, de vixencia do contrato asinado entre finais de 2015 e principios de 2016 entre ambas as partes.
O resultado deste contencioso saberase no próximo mes de marzo, data fixada polo xulgado do Mercantil de Lugo para sentenciar cal das dúas partes ten razón, pois mentres Casa Macán di que Lechera Asturiana rompeu a relación de forma unilateral, esta fala dun acordo mutuo.
Á espera da sentenza, o que parece estar claro é que en 2015, o importante grupo lácteo español chamou á porta da factoría taboadesa para desenvolver un proxecto moi ambicioso, consistente na elaboración de novos produtos e o traslado doutros que se realizaban en Pontevedra á planta de Taboada.
A práctica totalidade dos acredores, un total de 125, déronlle o visto e prace á continuidade da factoría situada en Taboada
Casa Macán asinou un acordo empresarial, o que lle supuxo realizar importantes investimentos para ampliar a súa industria e dotala de nova maquinaria para cumprir coas esixencias contractuais con Lechera Asturiana.
Con todo, a finais de 2016, este importante grupo lácteo a nivel español cambiou de opinión. Xa non quería saber nada de Casa Macán, polo que todo o investimento realizado por esta empresa e as súas perspectivas de crecemento viñeron ao traste.
Foi tal a incidencia desta decisión de Lechera Asturiana que a empresa taboadesa entrou en marzo do pasado ano en preconcurso de acredores que se materializou en firme en xuño do mesmo ano. Na actualidade, quince meses despois dunha situación que apuntaba á liquidación de Casa Macán. esta foi capaz de chegar a un acordo coa práctica totalidade dos seus acredores, un total de 125, para liquidar as súas débedas e seguir funcionando.
O propietario da firma taboadesa, Eladio Rigueira, non dubidou en agradecer a todos os acredores "confiar na viabilidade da nosa firma a pesar das dificultades que tivemos".
