Juan Carlos Armesto Quiroga (PP) colleu na mañá deste sábado as rendas do Concello do Saviñao, converténdose na única cara nova no que a rexedores locais se refire de toda a Ribeira Sacra. Ocupa o posto que deixou Joaquín González González, quen decidiu ceder a testemuña ao seu pupilo, quen desde o ano 1991, cando chegara á alcaldía, foi o seu primeiro tenente de alcalde.
Juan Carlos Armesto, na actualidade responsable de organización do PP a nivel provincial, ten como reto seguir o camiño emprendido polo seu antecesor, algo que, dixo, así fará.
Todo indica que o terá fácil para gobernar porque González non se retirou de todo. É o número dous da candidatura e xa mostrou o seu interese por seguir na casa consistorial para acompañar a Armesto en todo o que sexa necesario. O anuncio realizado meses atrás de que se xubilaba para dedicarse á súa familia e á súa explotación gandeira parece terse diluído un tanto.
OPOSICIÓN. En fronte, os populares terán a un grupo opositor que non llo porá nada fácil, o PSOE, con cinco edís dos once que conforman a corporación municipal.
O portavoz socialista, Celestino Rodríguez Pombo, xa anunciou que realizará unha oposición seria e á vez respectuosa, pero denunciando todo aquilo que poida ir, a xuízo do seu grupo, en contra dos intereses xerais do municipio e dos seus veciños.