Cans especializados en procura de persoas falecidas participan este venres na procura do home de 82 anos que desapareceu o pasado 9 de maio tras saír a pasear pola parroquia de San Clodio, no municipio lucense de Ribas de Sil.
Segundo informaron fontes do operativo de rastrexo, está previsto que inspeccionen a beira do Río Sil na localidade cos cans especializados en procura de vítimas da Garda Civil de Madrid.
Ao longo da xornada Protección Civil ten previsto, sinalaron as mesmas fontes, rastrexar cunha embarcación a canle do río, tamén coa presenza dos cans.
DESAPARICIÓN. O home, veciño desta zona, puido desorientarse mentres paseaba, unha actividade que realizaba habitualmente, apuntaron fontes do operativo, que recordaron que o primeiro día de rastrexo atopouse xunto ao río un xersei do octoxenario.
O 112 recibiu o aviso ás 16,00 horas do mércores 9 de maio por parte do GES de Quiroga, que comunicou a desaparición do octoxenario tras ser alertados pola familia do home.
