Un camioneiro sufriu feridas graves ao envocar o camión que conducía e que ía cargado con máis dun milleiro de aves este venres de madrugada na N-120, á altura do municipio lucense de Pantón. Como consecuencia do impacto, moitos animais morreron, outros resultaron feridos e outros máis deberán ser sacrificados debido ás graves lesións que sufriron.
O 112 Galicia tivo coñecemento do suceso ás 5.30 horas tras recibir unha chamada de alerta do propio condutor do camión. Indicaba que o vehículo que manexaba, cargado cun milleiro de pavos, se saíra da vía e quedara parado no medio da N-120, ao paso pola parroquia de Atán.
Nun primeiro momento, rexeitou a asistencia médica, pero pouco despois outro condutor que pasaba por alí chamou de novo para pedir unha ambulancia.
En canto á carga, máis dun milleiro de aves, moitas morreron, outras sobreviviron e algunhas resultaron malferidas polo que terán que ser sacrificadas. Para iso, será necesaria a intervención de persoal especializado, tal e como indicaron os axentes da Garda Civil de Tráfico desprazados no lugar do accidente.
