A Comisaría da Policía Nacional de Monforte de Lemos recibiu o reforzo das unidades de Cabalería da Comisaría Xeral de Seguridade Cidadá da Dirección Xeral da Policía, que se ocuparán de vixiar o monte, dentro do servizo de prevención de incendios, e da protección aos peregrinos que transitan a Santiago de Compostela co programa Protexamos os camiños: ano xubilar 2021-2022.
No marco do dispositivo policial para a prevención de incendios da Xefatura Superior de Policía de Galicia, denominado Lumes, contouse coa Unidade de Cabalería para realizar labores de vixilancia, prevención e investigación.
Do mesmo xeito que en anos anteriores, explica o Corpo Nacional de Policía nun comunicado, ese traballo "faise imprescindible", dado que as unidades "de cabalería poden acceder a lugares que son inaccesibles con vehículos motorizados".
Ademais, propicia o contacto directo cos veciños das diferentes parroquias do municipio, o que "fai que as labores de investigación sexan moito máis dinámicas".
Este xoves, unha patrulla da Unidade de Cabalería, apoiada por unha dotación do Grupo Local de Seguridade Cidadá da Comisaría de Monforte, percorreu o tramo do Camiño de Inverno que discorre por este municipio.
Ademais, estableceu contacto coa presidenta da Asociación de Camiños a Santiago pola Ribeira Sacra, Aída Menéndez, para cumprir as instrucións de informar as institucións vinculadas ao Camiño de Santiago, co obxectivo de darlle visibilidade á Policía Nacional no relativo á participación na difusión e protección do Camiño a Santiago de Compostela.
Está prevista a incorporación de máis patrullas ata o fin do dispositivo policial, previsto para o próximo día 30 de setembro.
