jueves. 02.04.2020 |
El tiempo
jueves. 02.04.2020
El tiempo

EMPRESAS DO CCU DE MONFORTE

Bazar Caurel pensa no futuro e prepara un cambio xeracional

Rocío e José Luis López, filla e pai que rexentan en Monforte Bazar Caurel. MIGUEL PIÑEIRO
Rocío e José Luis López, filla e pai que rexentan en Monforte Bazar Caurel. MIGUEL PIÑEIRO

José Luis López Raposo abriu o negocio, asociado ao potente grupo Cenor e especializado en venda e instalación de electrodomésticos, en 1984 e agora lévao da man da súa filla Rocío

Bazar Caurel abriu as súas portas en xaneiro de 1984, hai xusto 36 anos. Fíxoo José Luis López Raposo —natural do municipio que dá nome ao negocio— da man da súa esposa. A súa filla Rocío naceu anos despois. A súa infancia foi no interior dun local que aos poucos se converteu nunha referencia do comercio monfortino. A súa nai xubilouse e ela é agora quen saca adiante a tenda xunto ao seu pai. 

"Levo aquí tres anos e ao principio custoume. Moitos clientes pensaban que era unha empregada. Cando lles dicía que era a filla do propietario moitos recordaban cando viñan aquí e eu era unha nena", relata Rocío. 

O cambio xeracional parece asegurado. Tras superar uns inicios complicados, Rocío di sentirse cómoda e a gusto no negocio aberto polos seus pais alá polos anos 80, cando ela nin sequera nacera. Tamén ao seu pai se lle ve a gusto con esta situación e non oculta o seu desexo de que sexa a súa filla quen leve as rendas desde o día que el se xubile. 

Polo momento, ambos son as cabezas visibles dun proxecto moi consolidado. Bazar Caurel é especialista en venda de electrodomésticos de múltiples marcas e está asociado ao grupo Cenor. "É a maior cadea do norte de España", asegura José Luis. 

"O que máis nos gusta é o trato co público, preocuparnos de que queden contentos co noso servizo", explica Rocío

Rocío non tarda en afirmar que o que caracteriza o establecemento, un aspecto que ela quere manter a toda costa, é o trato co cliente. "Somos un negocio familiar e próximo á nosa xente. O que máis nos gusta é o trato co público, preocuparnos de que queden contentos co noso servizo", explica. 

TRABALLO. A tecnoloxía cambiou moito desde 1984 ata hoxe en día e Bazar Caurel tivo que ir renovando as súas existencias. Rocío sinala que un dos seus obxectivos "é chegar á xente máis nova" e a asociación con Cenor permitiulles ter unha importante presenza en internet

"Se alguén en Monforte realiza unha compra online, nós ocupámonos da instalación", subliña Rocío López. A nova comerciante indica que Bazar Caurel tamén fai repartos a domicilio. No caso de que alguén adquira, por exemplo, unha lavadora, a empresa monfortina ocúpase de levala á vivenda do cliente, colocala e retirar o aparello antigo. Esta metodoloxía permite coñecer os compradores e asesoralos máis facilmente. 

Achégase o San Valentín, e con el ábrese a posibilidade de comprar bos produtos a prezo reducido

Os electrodomésticos son o punto forte de Bazar Caurel, un negocio cuxa imaxe viviu igualmente unha forte renovación. Ao principio era unha pequena tenda situada nos Chaos. Hoxe evolucionou nun impoñente baixo da Rúa Roberto Baamonde. "Dentro de pouco chegamos ao Cardeal", chancea José Luis entre produtos do fogar, televisores e demais artigos que ela e a súa filla ofrecen aos clientes cada día. 

OFERTAS. Achégase o San Valentín (14 de febreiro), o considerado Día dos Namorados, e con el ábrese a posibilidade de comprar bos produtos a prezo reducido. Bazar Caurel inicia así unha iniciativa coa que pretende chamar a atención do público nunha data sinalada do calendario. 

Por suposto, o Centro Comercial Urbano (CCU) de Monforte e a súa filosofía están moi presentes. O colectivo trata de enxalzar as virtudes dos negocios locais e colocalos nunha boa posición dentro dun mercado cada vez máis competitivo e difícil. 

Bazar Caurel está asociado ao CCU e, como tal, ten moi presente esta forma de traballar. Atender ben o cliente e facer un seguimento de cada servizo é indispensable no seu día a día.

Máis datos 
Horario. Bazar Caurel abre de luns a venres entre as 9.30 e as 13.30 horas e as 16.00 e as 20.00 horas. Os sábados mantén o seu horario matutino. 

Redes sociais. O negocio conta cun perfil en Facebook e Rocío López anuncia que pronto estará en Instagram. As súas ofertas poden verse tamén na páxina web de Cenor.

Localización e contacto. Bazar Caurel atópase no número 50-52 da Rúa Roberto Baamonde de Monforte e ten dispoñible o número de teléfono 982.40.31.03.

Bazar Caurel pensa no futuro e prepara un cambio xeracional
Comentarios