O sindicato Unións Agrarias (UU.AA.) non ve operativo o plan que acaba de presentar o Ministerio de Agricultura para axudar ao sector vitivinícola pola crise de mercado derivada da pandemia da Covid-19. A formación asegura que ningunha das medidas anunciadas valen para a denominación de orixe Ribeira Sacra por falta de adecuación á súa realidade. UU.AA, esixirá que se respecte a especificidade do modelo de viticultura social existente no sur lucense.
O sindicato ve inviable que se avogue por derivar < strong>elaboración de vinagres e alcol de uso sanitario parte do viño almacenado, como o almacenamento privado de excedentes.
Tampouco considera oportuno que se fale dunha poda en verde para reducir a produción, cando na Ribeira Sacra estas non ten nada que ver coa extensiva que existe en Castela-A Mancha. Na denominación de orixe Ribeira Sacra chégase, como moito, aos sete millóns de quilos de uva recolleitos.
Respecto á mestura de anadas anteriores á actual de ata un 30%, como se valoraba a semana pasada desde a Consellería de Medio Rural, Unións Agrarias sinalou que non ten fácil concreción polas limitacións da Unión Europea, pois a súa ordenanza só permite chegar a un 25% e nuns casos moi específicos.
O sindicato propón que a Xunta de Galicia e o Ministerio de Agricultura unan esforzos para a elaboración dun plan adaptado á morfología do sector do viño na Ribeira Sacra, no que teña unha presenza relevante a viticultura social, as pequenas adegas con producións curtas pero con prezos altos con destino á restauración.