Katherinie Varela Fernández asumirá a substitución de Miguel Lemos como cabeza de lista do PP en Monforte despois de que o médico, nunha manobra insólita, comunicase este venres a través dun escrito que renunciaba a liderar a candidatura e emprazaba á dirección provincial a ser ela a que tomase a decisión sobre o liderado da formación na cidade.
Lemos non respondeu o venres a ningunha das numerosas chamadas que se lle fixeron desde este medio e os seus achegados remitíronse ao contido do comunicado oficial que transcendeu á primeira hora da tarde.
Nese texto, o xa excandidato afirmaba que desde o 28 de xaneiro asumira con moita responsabilidade a tarefa de liderar o partido, de crear unha xestora precongresual e de montar unha candidatura "competente". Aseguraba que aceptou o labor para dar resposta ás necesidades de Monforte e que esa foi a súa motivación durante todo o proceso.
Engadía ademais que creada a xestora e a lista, el tomaba a decisión de retirarse como candidato pero que seguía fiel ao proxecto do PP como "militante".
O propio Lemos e a dirección provincial evitaron aclarar os motivos do inesperado abandono
Ao mesmo tempo que se facía pública a información, a dirección a nivel provincial encerrábase nunha reunión eterna para decidir os pasos a dar e evitar que a crise do PP monfortino volvese pillalos de cheo. Ás dez da noite esa dirección, con Elena Candia e Carlos Armesto á fronte, explicou que se seguirá adiante co equipo formado por Miguel Lemos e que se busca unha alternativa "de continuidade".
Esa solución implica que Katherinie Varela Fernández, que xa fora presentada como número dous, suba un posto e tome as rendas da candidatura.
Nada oficial se filtrou o venres sobre os motivos de Lemos para deixar o seu proxecto de xeito tan brusco e con tan pouco tempo de marxe, aínda que algunhas fontes locais apuntaron que o home se atopou con máis hostilidades das previstas e que iso foi facendo mella nel.
A CANDIDATA. Katherinie Varela Fernández é licenciada en Dereito e na actualidade exerce en Monforte como avogada na especialidade de dereito laboral e bancario.
É filla do histórico popular monfortino Antonio Varela, que foi deputado autonómico na primeira lexislatura formando parte da Mesa do Parlamento.
Con todo, a decisión non sentou ben a Julia Rodríguez que comezou a defender o seu traballo con uñas e dentes e reclamou que fose o partido a nivel local o que tomase as decisións sobre o seu futuro.
Nas semanas seguintes Eireos chegou a renunciar por toda a controversia xerada e o partido volveulle a convencer para que asumise os mandos. Pero Julia Rodríguez reivindicou os dereitos do PP de Monforte a marcar os seus propios camiños e chegouse a nomear un comité para que tomase a decisión con autonomía.
Nos seguintes 120 días sucedéronse as reunións, púxose en dúbida a actuación desenvolvida en toda a problemática a nivel provincial e a imaxe do PP quedou especialmente danada.
Finalmente o 22 de febreiro presentouse nun acto na sede a Miguel Lemos, un home sobre o que non se puxera ningún foco, e chamouse á militancia a pechar filas ao redor dun mozo de consenso que acaba de abrir de novo a polémica.
Lemos acababa de ser pai e o presidente da Xunta chanceou co público e propúxolle a Lemos un desafío: "Se non gañas a eleccións vou falar coa túa muller para que te levantes ti cada noite que chore o bebé; vas saber o que é bo".