Os dous avaliadores da Unesco, un procedente de China e o outro de Francia, leváronse este martes pola mañá "unha boa impresión" da candidatura de Montañas do Courel durante o acto de presentación para converterse no primeiro xeoparque mundial no noroeste de España, que tivo lugar no Museo Etnográfico de Quiroga.
Martín Alemparte, do GDR Ribeira Sacra-Courel, confirmou a Efe que os representantes da Unesco recoñeceron que se fixo por parte dos promotores da candidatura "un bo traballo ao longo destes anos", pero tamén se mostraron interesados pola xestión que se realizará dese xeoparque se, finalmente, chega a producirse a declaración. "Como avaliadores da Unesco que son, interesáronse pola xestión, pola colaboración -da que dispoñen os promotores para levar adiante este proxecto- e polo apoio institucional", aclarou Alemparte.
Máis aló de coñecer a candidatura, "interesáronse por ver como podería funcionar o xeoparque do Courel" se finalmente se produce a esperada declaración, precisou.
Unha vez realizada a presentación da candidatura, os representantes da Unesco coñecerán ata o "xoves os recursos" que forman parte do proxecto de xeoparque, unha parte "máis divulgativa" da misión de avaliación, precisou Martín Alemparte, con visitas guiadas aos lugares de interese da comarca.
Esta noite, ademais, celebrarase unha recepción oficial aos avaliadores no Museo Etnográfico de Quiroga, á que asistirán o delegado territorial da Xunta de Galicia, José Manuel Balseiro; o secretario da Axencia Galega de Desenvolvemento Rural, Severino Álvarez; o portavoz do goberno da Deputación de Lugo, Álvaro Santos; e o presidente do GDR Ribeira Sacra-Courel, José Manuel Arias.
A Asociación para a promoción territorial Montañas do Courel, promotora da candidatura para que esta zona sexa declarada Xeoparque Mundial da Unesco, está integrada polos concellos de Ribas de Sil, Quiroga e Folgoso do Courel, de modo que nesa recepción participarán tamén os alcaldes deses tres municipios.
