Begoña González Aguiar, unha arqueóloga que traballa facendo prospeccións para instalar unha liña de alta tensión, atopou na parroquia de Merlán (Chantada) os primeiros petróglifos con combinacións circulares do municipio. Inmediatamente, informou do achado en Patrimonio, para que os recoñeza. Segundo a descubridora, os únicos gravados deste tipo na comarca chantadesa "atopáranse en Carballedo".
Os petróglifos son debuxos antigos feitos en roca ao aire libre, especialmente típicos dos períodos prehistóricos. En Galicia son moi abundantes e o seu significado deu pé a numerosos debates entre os investigadores.
Begoña González sinala que o tipo de gravado e a técnica empregada para realizalos indican que se estaría ante uns petróglifos da Idade de Bronce. Neles ven marcas de picados, algo habitual en Galicia se se quería deixar constancia de algo. "Aquí había o problema do clima. Se alguén quería marcar unha zona de bo pasto ou de abundante presenza de animais, tinga que tallar a pedra, para que a choiva non fixese desaparecer os gravados", explica a arqueóloga.
Na Idade Media empezaron a usarse metais para deixar as pedras marcadas con estas particulares escenas, pero o emprego das ferramentas deixa un tipo de rastro moi diferente ao dos petróglifos atopados por Begoña González en Chantada. Outro dos aspectos que diferencian aos gravados dunha e outra época é a súa utilidade.
O tipo de gravado e a técnica empregada para realizalo situarían a orixe dos petróglifos na Idade de Bronce
Os documentos do Medievo axudaron a precisar para que se estampaban os petróglifos nas pedras. Respecto dos da Idade de Bronce é moito máis complicado sabelo. Begoña González subliña que moitos petróglifos se usaban como altares nos que se facían rituais, pero tamén apareceron algúns con círculos ou cruces que servían como límites parroquiais.
"O significado de petróglifos tan antigos coma estes de Chantada descoñécese. Hai moitas teorías ao respecto, coma a que di que sinalaban lugares húmidos, pero o debate é aínda moi importante", detalla Begoña González.
Segundo indica a arqueóloga, nos petróglifos hai "varias coviñas e unha elipse" e para chegar a eles tivo que retirar bastante terra e pedra situada xusto por encima e que os escondía. Begoña González atopou os gravados mentres limpaba a zona para realizar a prospección.
