A Asociación Cultural Musical Luís Nieves busca financiamento para poder axudar a mozos sen recursos económicos a sufragar os seus estudos musicais. Este colectivo foi creado en homenaxe ao músico monfortino que lle dá nome e que faleceu en 2019 con só 22 anos, causando unha gran conmoción na cidade, onde era "moi querido e admirado", recorda con emoción a súa nai, Rosa Nieves, que hai dous anos impulsou esta asociación.
Agora, buscan recursos económicos para sacar adiante a convocatoria dunha bolsa que permita que un mozo poida cursar os seus estudos musicais no conservatorio ou en calquera outra escola de música de Monforte. Rosa estima que necesitarían aproximadamente uns 3.000 euros cada ano para pagar "ata onde podamos chegar" todas as mensualidades dos cursos, así como os libros de texto que vaia necesitar a persoa que resulte beneficiaria.
Polo momento é unha cantidade inasumible para a Asociación Cultural Luís Nieves, que se nutre exclusivamente das achegas mensuais de cinco euros que fan chegar os seus 27 socios.
Rosa Nieves, fundadora da Asociación, estima que necesitarían aproximadamente uns 3.000 euros ao ano para cubrir a bolsa, cantidade inasumible polas achegas mensuais dos seus socios
Os 135 euros que recadan ao mes polas cotas non son suficientes nin sequera para facer fronte aos gastos fixos que xeral o local social que a agrupación ten no número 36 da rúa Roberto Baamonde. "A familia está a pór o diñeiro para soster a sede, pero non nos importa con tal de manter a memoria de Luís", asegura Rosa, que fai un chamamento á sociedade para que se unan ao colectivo. "Gustaríanos que aumente o número de socios, son só cinco euros ao mes e servirán para que alguén cumpra o seu soño no mundo da música e, ao mesmo tempo, apoiar un bonito proxecto solidario", di. Tamén destaca que teñen á venda camisetas, que incluso personalizan grazas a unha máquina téxtil que adquiriron.
Rosa Nieves conta que xa solicitaron varias subvencións e espera que lles sexan concedidas canto antes para pór en marcha a bolsa, que será concedida seguindo criterios económicos, no menor prazo posible.
En activo desde 2019
A asociación comezou a xestarse no ano 2019, durante o enterro do mozo músico. "Á miña sobriña ocorréuselle a idea de crear a asociación para perpetuar a memoria de Luisito, que así lle chamabamos, e que ninguén o esqueza", explica Rosa.
