O articulista e cineasta chantadés Alfredo Pardo foi galardoado co premio Moncho do Pío polo seu traballo Días de viño e cereixas en Chantada, publicado por este diario o pasado 5 de xullo. A reportaxe fala do arraigamento da produción da froita na comarca e achega documentación do século XIX que fala sobre a calidade desta.
Alfredo Pardo é director cinematográfico pola Universidade Camilo José Cela (Madrid) e especialista en Xornalismo e Ciencias da Información pola Universidade Europea Miguel de Cervantes. Preside ademais a produtora Chantada Films, responsable da firma de múltiples proxectos audiovisuais.
Pardo foi tamén redactor do periódico Semanal Novo, crítico da banda deseñada na edición dixital da Nosa Terra e coordinador do Libro de Ouro do Círculo Recreativo e Cultural (Casino) de Chantada, así como un colaborador habitual do Progreso, no que fixo numerosas publicacións con datos históricos sobre Chantada e a súa comarca.
Como cineasta dirixiu as recentes películas Lola, O labirinto ario ou Garabolis. Con todo, un dos seus traballos máis rechamantes foi Punto e final, o seu primeiro filme, rodado en 1999 en Chantada e para o que contou coa participación de máis de cen veciños.
Todos estes traballos realizáronse co selo de Chantada Films, do mesmo xeito que documentais como Vinte anos de bravío, no que Pardo figura como produtor, ou videoclips de grupos e artistas como Miguel Costas (exvocalista de Sinistro Total) ou Liviao de Marrao.
A súa traxectoria mereceu diferentes galardóns e distincións. O Moncho do Pío únese ao primeiro premio de relatos A toda vela do Concello de Cambre ou o Bravú Xohán de Requeixo.
ACTO. A entrega do premio efectuarase o próximo 5 de decembro. Ese día, Alfredo Pardo recibirá un cadro do artista natural de Carballedo Randolfe Vilariño, un lote de viños da adega Terras de Bendaña (que é a que convoca anualmente o Moncho do Pío) e un diploma acreditativo.
Este certame de traballos xornalísticos alcanzou este ano as 18 edicións. O premio Moncho do Pío valora aqueles artigos que potencian calquera valor paisaxístico, económico, artístico, etnográfico ou patrimonial relacionado coa Ribeira Sacra.
