Aínda que varias adegas iniciaron en días pasados a recollida do froito, este xoves arrincou oficialmente a vendima en todo o territorio amparado pola Denominación de Orixe Ribeira Sacra, unha colleita para a que se prevé unha recollida de máis de sete millóns de quilos.
Logo de analizar os resultados dos controis de maduración, o 19 de setembro foi a data sinalada polo pleno do consello regulador.
Algunha das 99 adegas inscritas no rexistro do consello regulador xa finalizou a vendima, pero a maioría empezarán esta semana a recoller unha colleita de uva que, salvo imprevistos de última hora, será "excelente e superior aos sete millóns de quilos", segundo informou o propio órgano reitor.
Os controis de maduración, que comezaron o pasado 27 de agosto nas viñas, permitiron determinar o estado da colleita para fixar a data oficial do inicio da vendima na Ribeira Sacra. A recollida de uva prolongarase, previsiblemente, ata mediados de outubro.