Os Bombeiros de Monforte finalizaron este xoves o operativo despregado para extinguir un incendio que comezou o mércores pola tarde e que arrasou unha nave de Prodeme, de 6.000 metros cadrados, na que os seus propietarios gardaban toneladas de forraxe.
O voraz incendio provocou numerosos danos materiais na nave, situada nos arredores da cidade do Cabe, e que era utilizada pola asociación para almacenar rulos de herba e palla. Prodeme traballa para favorecer a autonomía e a integración de persoas con discapacidade. Segundo as primeiras estimacións, arderon unhas 150 toneladas deste material empregado como forraxe.
As primeiras hipóteses apuntan a un descoido dun dos aproximadamente 20 usuarios de Prodeme que desenvolven a súa actividade laboral neste lugar. O colectivo tamén aproveita os terreos onde se sitúa a nave en cuestión para gardar leña.
Todo apunta a un descoido dun dos usuarios da asociación que traballan no lugar
O incendio declarouse ao redor das 16.30 horas. O servizo de urxencias do 112 deu o aviso aos bombeiros do parque comarcal de Monforte, que traballaron durante horas para controlar e tratar de extinguir as chamas. Igualmente mobilizouse á Policía Nacional e ao equipo de prevención e defensa contra incendios forestais.
O 112 advertiu, ademais, ás urxencias sanitarias, pero segundo declararon fontes consultadas por este diario non foi necesario prestar asistencia médica a nadie. Todos os danos foron materiais e, aínda que aínda non se precisou a canto ascenden, estímase que poden ser moi elevados.
Ademais de toda a herba e palla acumulada na nave, o lume calcinou boa parte da cuberta e as paredes, así como un remolque autocargador que quedou moi deteriorado.
O lume divisouse desde moitos puntos do centro de Monforte a pesar de tratarse dunha zona rural, afastada do centro urbano. Pola espectacularidade das chamas, non poucos achegáronse a interesarse polo ocorrido.
