O presidente do Consello Regulador Ribeira Sacra, José Manuel Rodríguez, confirmou a aparición dos primeiros brotes de mildiu en diferentes lugares, zonas concretas da denominación de orixe, pero tamén precisou que están totalmente controlados por parte dos viticultores.
En declaracións a Efe, aclarou que "o tempo favorece a aparición dos fungos", porque "cunha humidade incrible e temperaturas que chegan aos 22 graos, móvense como peixe na auga".
En todo caso, insistiu en que eses primeiros brotes do temido fungo están "controlados e, en ningún caso, se trata de algo xeralizado" e que afecte ao volume da colleita, tal e como sucedeu "hai tres anos" no territorio da denominación de orixe.
A "floración" foi "ben", dixo Rodríguez, que tamén inflúe en que sexa máis fácil controlar os efectos do fungo, porque "chega máis tarde que outros anos"; en cambio, a "cepa xa superou esa fase, máis delicada" e agora é "máis resistente".
De feito, en canto á cantidade de uva, o presidente do consello regulador avanzou que será "un bo ano, porque as inclemencias do tempo, polo menos ata agora, non prexudicaron a evolución da colleita na Ribeira Sacra.
