Os arqueólogos que traballan nas escavacións do castro de San Lourenzo, situado na parroquia de Cereixa (A Pobra do Brollón), atoparon dous cranios nunha das máis de 60 tumbas que abriron e explorado. é a primeira vez que neste xacemento aparece unha fosa con caveiras de dous individuos, un feito que abre novas preguntas e hipóteses sobre o pasado da comarca.
Ata a data, todas as tumbas documentadas no castro de Cereixa consistían en inhumacións individuais. Nun dos enterramentos estudados de forma recente documentouse a presenza do esqueleto -o seu estado de conservación é malo- dun individuo. A sorpresa dos investigadores é que xusto á beira do seu cranio descansaba outro.
O técnico de cultura e turismo do Concello da Pobra do Brollón, Xosé Gago, declarou que foron trasladados a un laboratorio pola antropóloga Candela Martínez para facerlles as análises pertinentes. A partir destas indagacións aclararanse cuestións como o sexo dos individuos ou posibles marcas de enfermidades ou doenzas.
Con todo, o que máis chamou a atención dos expertos que traballan no castro é o feito de que a tumba estivese compartida por restos de dous seres humanos distintos. Segundo sinalaron desde o equipo de arqueólogos, esta práctica é moi común no cristianismo. Apártanse os ósos vellos e móvense a un recuncho para situar novos restos. Faise nos nichos feitos na terra e coñécese como enterramento secundario.
Unha das primeiras dúbidas a resolver afecta a este feito. Os investigadores tratarán de responder se a tumba en cuestión foi reutilizada e aberta para unha nova inhumación. De confirmarse esta hipótese, os arqueólogos cren que sería "a excepción que confirma a regra", pois o resto de fosas permaneceron seladas ata o inicio das investigacións en Cereixa.
Outra opción é que os enterradores baleirasen a tumba orixinal e colocasen un segundo defunto á beira do que xacía alí anteriormente. Os posibles motivos son múltiples. Por exemplo, que sexan dous seres queridos xuntos.
A terceira teoría di que o segundo cranio colocouse de forma intencionada durante o primeiro enterro. Este ritual é máis propio dos celtas e non se correspondería cun rito cristián.
Os descubridores esperan que as probas resolvan estas cuestións. Gago indicou que as análises se axilizarán a partir do mes que vén.