O corpo comarcal de bombeiros, a Policía Local e unha ambulancia do 061 montaron un amplo dispositivo pasadas as cinco e media da tarde deste luns para rescatar da súa vivenda a un octoxenario que caeu dentro da súa casa e que non podía abrir a porta para ser atendido.
Os feitos sucederon no terceiro piso do inmoble co número oito da Rúa Rof Codina, en pleno centro da cidade. A estreiteza da rúa e ao permitirse o estacionamento de turismos en ambas as marxes da calzada dificultou a entrada do vehículo dos bombeiros dotado dunha escaleira mecánica, que se desprazou ata o lugar por se era necesario acceder á vivenda a través dunha fiestra.
Finalmente, non foi necesario utilizar este método, pois os bombeiros foron capaces de abrir a porta do domicilio do ferido para que os sanitarios do 061 o meteran nunha padiola e o trasladaran ao hospital comarcal.
Foron os veciños, segundo as fontes consultadas, os que avisaron aos servizos de urxencia tras ouvir ao ancián pedir auxilio. Dixeron que ao vivir só sempre están atentos por se necesita algún tipo de axuda.
Numerosos residentes na rúa, así como transeúntes, concentráronse no lugar para saber que pasaba, seguindo atentamente os labores desenvolvidos polos bombeiros.
INCENDIO. Cando o 061 tiña controlado ao octoxenario para a súa evacuación ao centro sanitario saltou outra alarma, en concreto no Paseo do Malecón, onde alguén prendeu lume nas sementes de chopos que se acumulan estes días e que son altamente inflamables. Ata alí desprazáronse dous coches de bombeiros e a Policía Local, sufocando as chamas cun par de extintores. ás oito da tarde ocorreu un feito similar no mesmo punto, desprazándose de novo os bombeiros.
Na tarde do domingo aconteceu o mesmo no parque dos Condes, aínda que neste caso e debido a que o céspede estaba seco as chamas cobraron certa magnitude. Foron os dous policías locais de servizo os que, con outro extintor, sufocaron o lume antes de que se propagase.
Desde o Concello monfortino pediuse responsabilidade aos veciños, sobre todo aos mozos, para que non lle prendan lume ás sementes dos chopos que enchen estes días boa parte da cidade ao existir unha gran cantidade deste tipo de árbores.
Non é nada novo, pero este ano, debido ao tempo seco, esas sementes, tamén chamadas vilano, acumúlanse en grandes cantidades ao longo e ancho de toda a cidade. Incluso, cun lixeiro vento, parece como se nevase.
Noutras partes de España onde teñen un problema similar, como na comunidade de Navarra, leváronse a cabo campañas preventivas centrada en regar as zonas de acumulación deste elemento.
