Os escaparates, accesos e fiestras dos negocios de Chantada son esta semana lenzos nos que alumnos diso e primaria recrean a obra pictórica do artista Manuel Jorge.
A asociación que leva o nome deste arquitecto de profesión, natural do municipio e que desenvolveu o seu oficio na zona do Mediterráneo, impulsou a iniciativa co obxectivo de manter vivo o legado do pintor, falecido en 2020 aos 91 anos.
Lola López, profesora do instituto Val do Asma e membro do colectivo, propuxo a actividade e encárgase de coordinala. Son días de duro traballo extra fóra das aulas. Acompañada polos estudantes diríxese cada tarde aos establecementos participantes para decorar os vidros con recreacións dos cadros que no seu día elaborou Manuel Jorge.
Segundo apunta, a acción é "moi interesante para a mocidade", que intervén "na súa contorna máis próxima dunha forma creativa e sorprendente, xerando conexións emocionais tanto coa obra de Manuel Jorge como cos comercios e a veciñanza".
Así o fan. A profesora conta que o primeiro paso é dar aos nenos unha reprodución do cadro que van pintar. Logo realízase unha representación a escala para, finalmente, recrealo con acrílico e pincel. A este creativo proceso sumáronse os dous institutos, o Val do Asma e o Lama das Quendas, e o colexio Eloísa Rivadulla.
Conta Lola López que tanto os alumnos como os negocios están encantados coa experiencia. é máis, o resultado final é tan rechamante que non poucos establecementos interesáronse nas últimas horas para sumarse. "Non sei dar cumprido coa demanda", afirma a presidenta da asociación Amigos de Manuel Jorge, Mercedes Vázquez, o que corrobora Lola López.
Ata a data, os locais decorados son os das cafeterías Cantón, Capitol e Antoxos, a tenda de deportes Jamex e o hotel Mogay. Mañá xoves, os pequenos pintores, novos amigos de Manuel Jorge, actuarán nos bares Mánix e Número 13 e na sede temporal do colectivo, no número 8 da Praza de Santa Ana.
PROXECTOS. O gran obxectivo da asociación Amigos de Manuel Jorge é dar a coñecer a obra dun home que tivo que desenvolver toda a súa carreira profesional e artística lonxe da súa Chantada natal.
O colectivo fundouse en 2016 e desde entón levou a cabo numerosas iniciativas que permitiron aos habitantes do municipio coñecer a un dos seus veciños máis ilustres. O propio Manuel Jorge, aínda con vida, asistiu á presentación da asociación, que estreou as súas accións cunha gran exposición da obra do artista, a primeira retrospectiva que se fixo sobre el en Galicia.
O seu falecemento produciuse en plena ebulición da pandemia, polo que Amigos de Manuel Jorge tivo que pospor a súa homenaxe ata setembro do ano pasado. Foi no auditorio municipal de Chantada, por medio dun concerto de piano e violín acompañado de imaxes inéditas gravadas co propio pintor.
Durante aquel acto, Mercedes Vázquez anunciou a intención do colectivo de abrir na vila do río Asma un museo de arte contemporáneo para conservar a obra do arquitecto chantadés e servir de motor cultural á Ribeira Sacra.
Dito museo estará nunha antiga casa particular adquirida por Amigos de Manuel Jorge na Praza do Cantón. Mercedes Vázquez indicou que a previsión é ter todo listo para a inauguración en setembro ou outubro de 2023.
Queda moito traballo por diante. A asociación desexa conservar a estrutura da vivenda e, ao mesmo tempo, adaptala para albergar o museo, sumando unha planta á única que ten actualmente, por exemplo. Para iso é necesario adxudicar un complexo proxecto de restauración.
