A unidade asistencial de drogodependencias de Monforte recibiu avisos da aparición de boletos de apostas entre menores en varios centros educativos da cidade do Cabe. Afirman que cada vez ven con máis frecuencia e temen que algunhas plataformas lles estean deixando xogar a pesar de que os menores non o teñen permitido.
A educadora social da unidade, Luisa Astray, subliña que a ludopatía na comarca sempre existiu, pero ata agora se manifestara principalmente entre os adultos. Nos últimos anos, segundo di, a idade media dos apostantes descendeu de forma clara, aínda que este problema non existe só en Monforte e os arredores.
"Hai unha publicidade moi agresiva e as asociacións de ludópatas denuncian que as salas de xogo adoitan situarse nos barrios máis pobres das cidades", sinala Astray. A educadora da unidade de drogodependencias de Monforte mostra o seu desexo de que o Goberno regule tanto os anuncios como a presenza de famosos nos mesmos e chama a establecer programas de prevención.
"A ludopatía trátase como unha adicción, aínda que non haxa ningunha sustancia polo medio", indica Luisa Astray. A pesar da preocupación, de momento ningún centro solicitou á unidade que organice charlas para alertar aos menores dos perigos de apostar, como si se fai coas drogas, o tabaco ou o alcol.
RENDEMENTO. Luisa Astray asegura que nos centros educativos houbo unha diminución xeral nos resultados académicos. A baixada de notas pode explicarse pola adicción ás novas tecnoloxías, que tamén preocupa á educadora.
"O gran problema está nos xogos online. As salas de apostas poden controlar a presenza de menores pedindo o DNI, pero co móbil é moito máis difícil previr", asevera Luisa Astray. Os teléfonos móbiles e o excesivo uso das redes sociais tampouco axudan.
Nos últimos tempos apareceron numerosas voces que alertan desta problemática e varios partidos políticos pediron ao Goberno que prohiba a instalación de salas de xogo preto dos centros escolares. Luisa Astray chama, no entanto, a comezar a prevención na casa. "Hai algúns nenos que teñen como agasallo de Reis diñeiro para xogar online. Iso é o que non pode ser", di.
