miércoles. 11.12.2019 |
El tiempo
miércoles. 11.12.2019
El tiempo

Alarma na hostalería da zona sur tras dous novos roubos en Chantada

Imaxe do bar Penela coa máquina de tabaco esnaquizada MP
Imaxe do bar Penela coa máquina de tabaco esnaquizada MP
Os ladróns usaron procedementos idénticos aos sufridos hai xusto unha semana en dous coñecidos establecementos de Monforte

A preocupación estendeuse entre os hostaleiros da comarca tras dous novos roubos de madrugada. Se hai unha semana sufriron os asaltos os bares monfortinos Prisma e Breogán, nesta ocasión os afectados foron os propietarios da cafetería Penela do restaurante Daydos, en Chantada.

Como o Prisma e o Breogán, situados na Avenida de Galicia, os dous establecementos en cuestión atópanse na mesma rúa, a Avenida de Monforte. E do mesmo xeito que nos negocios monfortinos, en Chantada os cacos rebentaron os bombines das portas, accederon ao interior, se ensañaron coas máquinas comecartos e expendedoras de tabaco e furgaron nas caixas rexistradoras sen que as alarmas saltasen.

No caso da cafetería Penela, unha das máis concorridas do centro urbano polas mañás pola súa proximidade co centro de saúde, os ladróns accederon ao local a través dunha terraza interior que dá á rúa. Tras saltar o muro pulverizaron a persiana e a fechadura da porta que conecta este espazo co local. Unha vez dentro, a peor parte leváronlla o comecartos e a máquina de tabaco, que apareceron esnaquizadas cando os propietarios acudiron pola mañá para dar comezo á súa xornada laboral.

O restaurante Daydos áchase na mesma avenida, aínda que máis afastado do centro. Sitúase na saída de Chantada cara a Monforte, enfronte dun colexio e un instituto. Como no bar Penela, os asaltantes non empregaron a entrada principal para acceder, senón unha porta lateral. Do mesmo xeito que no outro negocio afectado, os donos viron o que ocorrera á primeira hora, ao abrir.

Os caixóns das máquinas onde se gardan as moedas estaban tirados na terraza e tanto o comecartos como a expendedora de tabaco foran forzadas. Os responsables do local, que residen encima do mesmo, dixeron escoitar un ruído sobre as cinco da madrugada, pero o atribuíron ao can dun veciño. Ao chegar ao establecemento horas despois descubriron os danos ocasionados pola intrusión.

A similitude dos métodos empregados invita a pensar que os autores dos roubos foron os mesmos que a semana pasada actuaron no centro de Monforte.

Alarma na hostalería da zona sur tras dous novos roubos en Chantada
Comentarios