Agader apoia con 40.000 euros rehabilitar un muíño en Bóveda

A Axencia Galega de Desenvolvemento Rural (Agader) asumiu o custo das obras de rehabilitación do coñecido como muíño dos Fernández. Trátase dunha construción que aínda que se encadra na definición de muíño de río conta cunha serie de peculiaridades que fan da recuperación e posta en valor un proxecto singular con identidade propia, segundo destacou o alcalde, José Manuel Arias. A presidenta de Agader, Inés Santé, e o delegado territorial da Xunta, Javier Arias, visitaron o lugar na mañá deste luns para coñecer os plans do rexedor bovedense.

O rexedor agradeceu a disposición da familia para ceder de forma gratuíta este inmoble que destaca polo importancia etnográfica, cultural e patrimonial como elemento identificativo da cultura rural de Galicia, dixo Arias. Circunstancias que tamén xustificou Inés Santé para conceder a subvención.

Ademais deste proxecto, o goberno local ten en marcha a rehabilitación do conxunto etnográfico do Souto, en concreto a recuperación dunha ponte sobre o río Mao e o denominado Camiño do Souto, de especial interese para todos aqueles que practican sendeirismo. Neste caso, as actuacións contan cunha axuda de 28.000 euros procedente da Consellería de Medio Rural.

José Manuel Arias explicou que esta intervención integral na zona do Souto pretende "pór en valor todos estes elementos e recuperar esta contorna privilexiada para o uso público".

O Concello bovedense leva anos dedicado á posta en valor dos seus principais elementos etnográficos, como foi o caso da Ferreiría de Penacoba ou a restauración do Muiño do Xil. A maiores, o alcalde sinalou que espera poder recuperar dúas presas no río Mao.