Adif aprobou a licitación das obras de mellora de plataformas e cruces na estación de Monforte de Lemos, por un importe de 3.766.577,06 euros. Segundo informou o propio xestor de infraestruturas ferroviarias, estes traballos de mellora forman parte dos proxectos de modernización do corredor ferroviario Ourense-Monforte de Lemos-Lugo.
A súa finalidade, segundo explica nun comunicado, é dobre, por unha banda mellorar o estado da infraestrutura e, pola outra, aumentar a fiabilidade das liñas e a calidade do servizo. "Estes labores contribúen ao desenvolvemento doutros obxectivos fundamentais de Adif, como a seguridade das circulacións ferroviarias e dos viaxeiros, o tránsito e acceso universal dos usuarios e a integración das estacións no ámbito urbano, fomentando a cohesión social dun xeito sostible", engade.
O obxectivo é adecuar a estación aos requirimentos técnicos e de accesibilidade para persoas con mobilidade reducida que marca a normativa en vigor, en especial no relativo ás cruces de vías entre plataformas para viaxeiros. Os traballos servirán, á súa vez, para adaptar os elementos obxecto deste contrato ás novas condicións de explotación que traerán consigo as actuacións de mellora previstas neste tramo.
