O Administrador de Infraestruturas Ferroviarias (Adif) ten en marcha dous proxectos de mellora da accesibilidade á estación ferroviaria monfortina nos que inviste un montante de 60.000 euros. Un deles era longamente demandado pola veciñanza do barrio da Estación e usuarios do tren, consistente en corrixir os importantes desniveis existentes na calzada de acceso á terminal (un armazón de lastros), pero tamén para frear a deterioración dos farois dos anos 50, típicas da arquitectura industrial daquela época (son de formigón).
As luminarias xa locen nova presenza e desde hai días varios operarios levantan os lastros da praza da estación para colocalos de novo e así eliminar calquera irregularidade que poida haber no piso.
Desde Adif explicaron que con cargo aos orzamentos do exercicio 2019 e por importe de 39.376 euros procédese á modernización dos farois exteriores, xunto a instalación dunha iluminación de reforzo para a mellora das condicións de accesibilidade ao longo da beirarrúa da fachada principal, a sinalización das prazas de estacionamento, o pintado parcial da parte baixa da fachada exterior da estación, a reparación de strong<> a impermeabilización da marquesiña da plataforma un e o repintado das zonas afectadas pola humidade, así como a reparación do pavimento da plataforma tres.
Con cargo aos orzamentos deste ano (20.000 euros) se executará a normalización da sinalización de evacuación, a mellora das condicións de protección contra incendios no interior do edificio e a reposición de luces de urxencia e extintores.
