O consello de administración de Adif aprobou a adxudicación dun contrato de subministración e transporte de 15.118 toneladas de carril -a parte metálica da vía- dentro do proxecto de renovación e mellora da liña ferroviaria Ourense-Monforte-Lugo.
O adxudicatario do contrato, que ascende a un total de 14.683.075,44 euros (Iva incluído), foi a firma ArcelorMittal España.
As actuacións de mellora do tramo en servizo Ourense-Monforte-Lugo, nas que se enmarca esta adxudicación, teñen como obxectivo cumprir os compromisos de Adif coa optimización das condicións de explotación comercial do traxecto, en parámetros talles como a fiabilidade, o confort e os tempos de viaxe.
A aprobación deste contrato súmase á adxudicación do balasto (pedra), as travesas e outros accesorios (desvíos) que se formalizou o pasado mes de outubro.
A obra divídese en dous bloques e contempla a subministración e transporte dun total de 15.118 toneladas
Agora, con todo o material adxudicado e a electrificación do tramo (licitado en novembro por 83 millóns), xa só falta por licitar e adxudicar o que sería a montaxe final da vía.
Dentro deste proceso de mellora do traxecto Ourense-Monforte-Lugo, Adif recorda que desde o mes de abril de 2018 xa se atopa en servizo a variante da Pobra de San Xiao, entre Monforte e Lugo.
Entre os principais beneficios que achegou este novo tramo, duns sete quilómetros de lonxitude, destaca a supresión dos 14 pasos a nivel do antigo trazado, co consecuente aumento da seguridade ferroviaria, viaria e peonil, así como o incremento da velocidade dos trens ata os 160 quilómetros por hora.
