A actividade de Casa Macán segue paralizada tras outra inspección

A Consellería de Sanidade mantén a suspensión cautelar de actividades na empresa Casa Macán, asentada en Taboada, á espera de que queden emendadas por parte da industria láctea as deficiencias detectadas nas súas instalacións, algo que aínda non ocorrería.

Fontes da Xunta informaron a Efe de que, a demanda do propietario da empresa, Eladio Rigueira, inspectores da Dirección Xeral de Saúde Pública regresaron este luns á fábrica de Taboada para realizar unha nova inspección e comprobar se, efectivamente, estaban corrixidas as deficiencias detectadas no control oficial da semana pasada.

Ao non ser emendados "todos os incumprimentos detectados", os inspectores tomaron a decisión de manter o peche cautelar das instalacións, porque aínda non se pode garantir a seguridade dos produtos que alí se elaboran.

Ademais, a Consellería de Medio Rural ten aberto un expediente sancionador á explotación gandeira de Eladio Rigueira por cuestións relacionadas co benestar animal. Ese expediente, aberto en 2019, atópase en proceso de tramitación, aínda que é "independente de calquera outra acción que se leve a cabo en relación" coa empresa por parte doutros departamentos da administración autonómica.