Un veciño do Saviñao coas iniciais A.L.L. aceptou no xuízo celebrado este mércores unha pena de cinco meses de cárcere e un ano de inhabilitación para o coidado de animais ao admitir que foi culpable dun delito de malos tratos animais por manter en pésimas condicións de alimentación, hixiene e salubridade á súa cabana bovina, composta por unhas 70 vacas frisoas. Iso causoulle a morte a varias, cuxos restos foron atopados en estado de descomposición preto da granxa, nalgúns casos; e só os restos óseos, noutros.
Ademais, un bo número de animais vivos foron diagnosticados de padecer raquitismo e deformacións óseas por atoparse extremadamente delgados e desnutridos. Como consecuencia desta situación, propúxose o sacrificio de varias tenreiras pola imposibilidade da súa recuperación. O acordo ao que se chegou entre as partes no xuízo rebaixa en tres meses a pena de prisión solicitada pola Fiscalía e nun ano a inhabilitación para o exercicio da profesión ou cargo que teña que ver co coidado de animais.
En Chantada produciuse en 2016 un caso similar, con 40 vacas mortas de fame e outras 20 en grave estado de desnutrición
CHANTADA. A morte por inanición destas vacas non é o único suceso deste tipo rexistrado na comarca. En 2016, un gandeiro de Chantada, en concreto da parroquia de Axulfe, foi denunciado tras aparecer na súa explotación corenta reses mortas e outras vinte en grave estado de malnutrición. Naquel caso, que aínda segue pendente de resolución, o acusado xustificouse ante o xuíz que lle tomou declaración asegurando que o penso e a palla que tiña almacenados nun silo sufriron unha infección bacteriana que se transmitiu ás reses, causándolles o óbito.
O seu avogado aludiu tamén á grave situación económica na que se atopaba o afectado, así como ao seu mal estado de saúde, que lle impediu facer algo máis por garantir a perfecta salubridade das instalacións e a alimentación dos animais que posuía. O caso de Chantada causara no seu día unha gran alarma social, pola gran cantidade de reses mortas e polo pésimo estado na que se atopaban as que lograron sobrevivir.
