Un mozo de 18 anos de idade, cuxo nome se corresponde coas iniciais C.L.M., veciño da rúa Chantada de Monforte, sufriu un accidente laboral sobre as seis da tarde deste martes na parroquia de Reigada, onde traballaba nun proxecto de ampliación dunha nave dunha explotación de gando vacún. Segundo puido saber este diario, o primeiro diagnóstico sobre o seu estado de saúde foi cualificado de grave.
O sinistro ocorreu cando o mozo traballador se precipitou ao baleiro desde unha altura duns cinco metros ao ceder unhas uralitas traslúcidas. C.L.M. levaba un arnés que non puido fixar a un punto de ancoraxe antes de sufrir a caída.
Foi trasladado nunha ambulancia do 061 ao hospital comarcal de Monforte. Queixábase dunha forte dor na boneca esquerda. Tamén presentaba un forte traumatismo no nocello esquerdo e na zona lumbar, así como diferentes contusións.
Ata o lugar do sinistro, ademais do 061, desprazáronse efectivos tanto da Policía Nacional como da Garda Civil alertados polo servizo de urxencias da Xunta de Galicia, o 112.
BÓVEDA. Este non foi o único suceso que se produciu este martes na comarca Terras de Lemos. Un veciño de Bóveda resultou ferido de gravidade ao perder o control do vehículo que conducía e encaixouse contra unha árbore.
O accidente ocorreu sobre as cinco e media da mañá no quilómetro 2,1 da estrada provincial LU-P-0905. Foi un particular que se decatou da saída de vía e o choque contra a árbore o que alertou ao 112, que avisou ao 061 e ao corpo comarcal de bombeiros que se desprazaron ata o lugar por se era necesario proceder á excarceración do ferido, algo que finalmente non foi necesario.
INCENDIO. Pasadas as oito da tarde deste martes, os bombeiros tiveron que acudir ao poboado xitano das Lamas, en Monforte, para sufocar un incendio nunha chabola que se orixinou nuns colchóns.
Non houbo que lamentar danos persoais. En canto aos materiais, as fontes consultadas dixeron que foron escasos.
