O presidente do Consello Regulador Ribeira Sacra, José Manuel Rodríguez, dá por "rematada" a vendima deste ano no territorio amparado pola denominación de orixe, con case 6,2 millóns de quilos de uva recollidos.
Das 93 adegas que producirán viño ao amparo do consello regulador, tan só unha continúa cos traballos de recollida, pero xa en lugares “moi puntuais”, explicou Rodríguez, quen dá por finalizada unha vendima que transcorreu “con normalidade”, grazas ao bo tempo que gozou a comarca.
“Cumpríronse as expectativas”, dixo Rodríguez, quen considera que, neste caso, a mellor noticia é que “non hai noticia”, porque o bo tempo axudou a que a maduración do froito e o estado sanitario fose óptimo, ademais de facilitar os traballos de recollida.
“Diciamos que nos moveriamos ao redor dos seis millóns de quilos de uva e, ao final, foron algo máis. Cumpríronse as expectativas dentro dun ano normal na Ribeira Sacra”.
Dos 6.171.228 quilos de uva recollidos na denominación de orixe, 5.207.735 son da variedade preferente mencía, mentres que no que se refire ás uvas brancas, é a Godello, con 303.009 quilos, a máis abundante.
