O presidente do Grupo Hotusa, Amancio López Seijas, presentou este venres o novo Eurostars Pazo de Sober, un hotel de catro estrelas en plena Ribeira Sacra cuxa apertura, segundo informou o propio empresario, prodúcese logo dunha profunda rehabilitación deste edificio histórico, que estivo pechado durante catro anos.
Trátase da segunda presentación do Eurostars Hotel Company -a área hostaleira do grupo Hotusa- na provincia de Lugo en tan só dous días, dado que este mesmo xoves foi inaugurado o Gran Hotel de Lugo, outro establecemento de catro estrelas, neste caso na capital lucense, logo dunha reforma na que a empresa de Amancio López investiu catro millóns e medio de euros.
En declaracións aos medios de comunicación, Amancio López recoñeceu que “como empresario hostaleiro” é un “auténtico orgullo e un privilexio ter a ocasión de recuperar este establecemento cargado de historia e situado nunha privilexiada contorna, considerado ben de interese cultural”.
Hotusa informou de que se trata do “pazo máis grande de Galicia, con máis de 4.000 metros cadrados e tres alturas”
O novo establecemento ofrece corenta e tres habitacións nun edificio situado en pleno corazón da Ribeira Sacra, sobre unha superficie duns 20.000 metros cadrados de xardíns, no que os futuros clientes poderán gozar de servizos como unha piscina exterior, spa, salóns para eventos e un restaurante cunha cociña baseada nos produtos autóctonos.
Para reabrir as instalacións do hotel, a compañía realizou unha profunda rehabilitación interior e exterior do edificio “con especial cautela e atención” para “conservar a esencia e estética orixinal do inmoble”.
Ademais, nas zonas verdes que rodean o hotel, “intentouse recrear o ambiente dos xardíns históricos mediante o cultivo de variedades típicas dos xardíns dos pazos galegos” e plantáronse árbores autóctonas, como loureiros ou castaños.
Hotusa informou de que se trata do “pazo máis grande de Galicia, con máis de 4.000 metros cadrados e tres alturas”, así como que se trata dun edificio “con moita historia”, dado que “a fundación deste caserón data do ano 740 e atribúeselle a Vasco López de Lemos”, aínda que o palacio pasou por diferentes mans e seguiu crecendo ata que no XIX levantouse a capela.
O edificio foi cambiando de propietarios ata que a finais dos anos 90 do S.XX a súa propiedade regresou a unha familia de Sober e en 2010 foi convertido nun hotel que só permaneceu aberto ata 2014
