A Ribeira Sacra mira ao futuro e nel aparece a necesidade de adaptarse durante un tempo ás esixencias impostas pola pandemia de Covid-19. é o caso de Aba Sacra, unha empresa turística que organiza rutas en tren polos canóns do Sil. A compañía adquiriu dous novos vagóns que están a ser adaptados para dar servizo de forma segura aos visitantes, evitando a propagación do coronavirus.
O impulsor do proxecto, Antonio Rodríguez, sinala que Aba Sacra fíxose con este tren coa idea de sumalo ao seu servizo a pasada Semana Santa. A crise sanitaria cambiou por completo todos os plans.
Antonio Rodríguez avanza que o novo tren terá unha porta para cada unha das persoas que se suban a gozar dos traxectos pola subzona de Amandi (Sober). Serán un total de oito. Ademais, só ocuparase un 30% do aforamento total do tren, ao que accederá para un mesmo viaxe un máximo de 16 persoas. En condicións normais poderían ir 56.
Outra opción que se contempla é instalar biombos no interior dos vagóns para separar aos usuarios. Con todo, Antonio Rodríguez engade que aínda "estamos pendentes de que se definan as diferentes normas a cumprir polo noso sector".
A previsión é que o novo tren turístico de Aba Sacra poida porse en marcha a segunda quincena de xuño. Todo dependerá de como avance a situación sanitaria en España.
Antonio Rodríguez cre que o camiño a seguir para os próximos meses é apostar polo turismo local, de proximidade. "Moitas veces viaxamos ao extranxeiro sen coñecer a nosa realidade, a que está máis preto de nós", di o impulsor de Aba Sacra, quen considera que a pandemia de Covid-19 pode abrir unha porta "a un turismo de calidade, non masificado e máis cultural".
